Nokkuð ber á því að matur og aðrar nauðsynjavörur fáist ekki tollafgreiddar vegna verkfalls SFR. Innflytjendur heilbrigðisvara á borð við sprautunálar og sprautur, sem notaðar eru á sjúkrahúsum, hafa sótt um undanþágur til undanþágunefndar SFR, en þær hafa enn ekki fengist afgreiddar.

Í frétt á vef Félags atvinnurekenda segir að tollstjóri hafi gefið það út áður til verkfalls kom að það myndi ekki hafa áhrif á tollafgreiðslu skipa og flugvéla en annað virðist nú hafa komið á daginn. 

„Félagi atvinnurekenda er kunnugt um að farmskrár frá flutningafélögum lesist í mörgum tilvikum ekki sjálfkrafa rafrænt inn í kerfi Tollstjóra. Enginn sinnir slíkum uppákomum í verkfallinu og fást þá viðkomandi vörur ekki tollafgreiddar. Ennfremur kemur í ljós að svokallaðar safnsendingar, sem flutningafyrirtæki flytja inn í eigin nafni fyrir nokkra viðskiptavini, stoppa í tollinum vegna þess að ekki er hægt að skipta þeim upp þannig að hver innflytjandi fyrir sig geti leyst út sínar vörur,“ segir í fréttinni. 

Innflytjendur heilbrigðisvara á borð við sprautunálar og sprautur, sem notaðar eru á sjúkrahúsum, hafi sótt um undanþágur til undanþágunefndar SFR, en þær hafa enn ekki fengist afgreiddar. Þá segir einnig að Landspítalinn sé í brýnni þörf fyrir að vörurnar fáist afhentar og þeir sem flytja inn vörur kvarti undan því að ferli undanþágubeiðna sé óskýrt, ólíkt því sem gerðist í verkfalli BHM-félaga hjá Matvælastofnun fyrr á árinu.

„Þá hefur tímabundið verkfall SFR-fólks hjá Matvælastofnun haft áhrif; þurrmjólk fyrir ungabörn fékkst til dæmis ekki tollafgreidd vegna þess að starfsmaður sem skrifar upp á heilbrigðisvottorð fyrir vöruna er í verkfalli,“ segir í fréttinni. 

„Þetta er í annað sinn á skömmum tíma sem alvarlegar truflanir verða á innflutningi vegna verkfalls opinberra starfsmanna. Því miður stefnir í skort á ýmsum nauðsynjavörum dragist verkfallið á langinn,“ er haft eftir Ólafi Stephensen, framkvæmdastjóri FA, í fréttinni. 

„Eins og í verkfalli BHM beinum við þeim tilmælum til forstöðumanna og stjórnenda ríkisstofnana, sem ekki eru í verkfalli, að þeir sinni skyldum sínum og takmarki það tjón sem af verkfallinu leiðir. Þeir hafa heimild til að ganga í störf undirmanna samkvæmt skýrum fordæmum í íslenskum vinnurétti og geta þannig bjargað verðmætum og afstýrt fjárhagstjóni umfram það sem óumflýjanlega fylgir verkfalli.“