Alþingi samþykkti fyrir skömmu ný náttúruverndarlög og voru þau samþykkt með 42 samhljóma atkvæðum.
Sigrún Magnúsdóttir, umhverfis- og auðlindaráðherra, segist fagna mjög niðurstöðunni en lögin eru sögð vera mikilvægt skref í náttúruvernd til framtíðar. Þá kom fram í umræðum á Alþingi að helstu deilumál í tengslum við ný lög hafi verið leyst, en afgreiðslu frumvarpsins var frestað á vorþingi til að tryggja að það fengi fullnægjandi umfjöllun.
„Það er mér metnaðarmál að ný náttúruverndarlög verði afgreidd á Alþingi í haust,“ sagði Sigrún í samtali við Morgunblaðið í tilefni Dags íslenskrar náttúru í september sl.