Talsverð snjókoma er nú í höfuðborginni en samkvæmt upplýsingum frá Veðurstofu Íslands mun halda áfram að snjóa í kvöld og fram á morgun. Þeir vegfarendur sem enn aka um á sumardekkjum gætu því lent í vandræðum á ferð sinni um götur borgarinnar.
„Það mun ganga á með nokkuð þykkum éljum fram á morgun. Þetta mun að líkindum ekki bráðna á næstunni því samhliða er kólnandi veður,“ segir Haraldur Eiríksson, veðurfræðingur hjá Veðurstofu Íslands, í samtali við mbl.is en spáð er köldu yfir helgina.
„Það verður í raun kuldakast um helgina með alvöru vetrarveðri á landinu,“ segir Haraldur, en vert er að benda vegfarendum sérstaklega á að víða má nú finna talsverða hálku á höfuðborgarsvæðinu.
Með fréttinni má sjá myndir sem ljósmyndarar Morgunblaðsins og mbl.is tóku á ferðum sínum um borgina er snjóa tók.
Nánar má fylgjast með veðri á veðurvef mbl.is