Siglufjarðarvegi og veginum um Ólafsfjarðarmúla hefur verið lokað vegna snjóflóða og áframhaldandi hættu á snjóflóðum á svæðinu. Enn snjóar á Norðurlandi og horfur eru á versnandi færð með deginum.
Eftirfarandi frétt birtist á vef Vegagerðarinnar í dag kl. 14.19, en hált er um land allt eftir snjókomu síðustu daga.
Snjókomubakkinn norðanlands er ansi dimmur og enn er að bæta í vind. Veðurhæð verður nærri 15 m/s um og upp úr miðjum degi, en undir kvöld fer heldur að draga úr á Holtavörðuheiði og í Húnavatnssýslum. Á Vestfjörðum verður éljagangur og skafrenningur á fjallvegum í allan dag. Norðaustan- og austanlands verður veður skaplegra, en þar má þó búast við éljum eða snjókomu síðar í dag og hvasst um tíma.
Búið er að loka veginum um Siglufjarðarveg og Ólafsfjarðarmúla vegna snjóflóða og snjóflóðahættu.
Hálkublettir eru á Reykjanesbraut en hálka á Hellisheiði og í Þrengslum. Hálka eða hálkublettir og sumstaðar snjóþekja er á vegum á Suður- og Suðvesturlandi.
Snjóþekja og snjókoma er á Holtavörðuheiði og þungfært er um Bröttubrekku en mokstur stendur yfir. Annars er snjóþekja, hálka eða hálkublettir á Vesturlandi.
Á Vestfjörðum er snjóþekja á Steingrímsfjarðarheiði og Þröskuldum þar sem einnig er skafrenningur. Hálka eða snjóþekja er annars á flestum öðrum leiðum, þó er þæfingsfærð og skafrenningur á Klettshálsi. Ófært er úr Bjarnarfirði í Árneshrepp og ófært er einnig um Hrafnseyrarheiði og Dynjandisheiði.
Á Norðurlandi er nú víða farið að snjóa töluvert og búist er við að færð geti versnað þegar líða tekur á daginn. Lokað er vegna snjóflóða um Siglufjarðarveg og Ólafsfjarðarmúla.
Á Norðvesturlandi er snjóþekja og snjókoma eða skafrenningur víðast hvar. Norðaustanlands er snjóþekja og snjókoma á flestum leiðum, þæfingsfærð er á Hólasandi og Hófaskarði. Flughált er á Dettifossvegi.
Á Austurlandi er hálka, snjóþekja eða hálkublettir.
Vegna vinnu við endurbætur á rafkerfi í Strákagöngum má búast við umferðartöfum
þar á virkum dögum frá klukkan 8.00-18.00 í nóvember og til 22. desember.