Enginn fundur hefur verið boðaður í kjaradeilu starfsmanna álversins í Straumsvík í dag. Þetta staðfesti Ólafur Teitur Guðnason, talsmaður Rio Tinto á Íslandi.
Að öllu óbreyttu stefnir því í að verkfall hefjist á miðnætti í kvöld. „Við höldum í vonina um að það sé hægt að koma í veg fyrir það,“ segir Ólafur Teitur.
Samkomulag álversins og starfsmanna kveður á um að starfsmenn mæti til vinnu í tvær vikur eftir að verkfallið skellur á til þess að slökkva á 480 kerum álversins.
„Það verður byrjað að slökkva á þeim einhvern tímann á morgun,“ segir hann og kveðst hvorki vera svartsýnn né bjartsýnn á að deilan leysist í tæka tíð. „Ég vona bara það besta.“