Lögreglumaðurinn sem sakaður hefur verið um óeðlileg samskipti við brotamenn í störfum sínum hjá fíkniefnadeild lögreglunnar er enn til rannsóknar hjá héraðssaksóknara. Ólafur Hauksson, héraðssaksóknari, segir rannsóknina langt á veg komna og búið sé að taka talsvert af skýrslum í málinu.
Maðurinn var leystur frá störfum um miðjan janúarmánuð í stundarsakir, en hann hafði áður verið fluttur til í starfi innan lögreglunnar vegna ásakana um hvernig samskiptum hans væri háttað við brotamenn.
Ekki er um að ræða sama mál og þar sem lögreglumaður var settur í gæsluvarðhald eftir að saksóknara barst í hendur upptaka af óeðlilegum samskiptum hans við brotamann. Sá var einnig leystur frá störfum á mánudaginn. Mennirnir eiga það þó sameiginlegt að hafa báðir starfað innan fíkniefnadeildar lögreglunnar.