Námserfiðleikar eru ekki eina ástæðan fyrir því að rúm 28% grunnskólanemenda eru í sérkennslu.
Ástæðurnar eru margvíslegar og meðal þeirra eru andlegir erfiðleikar eins og kvíði, þunglyndi og samskiptaerfiðleikar. Þetta segir Sædís Ósk Harðardóttir, formaður Félags íslenskra sérkennara, í umfjöllun um mál þetta í Morgunblaðinu í dag.
Áætlað er að sérkennsla í grunnskólum Reykjavíkurborgar kosti rúmlega 1,685 milljarða króna á yfirstandandi skólaári. Jóhanna Thelma Einarsdóttir, dósent við Menntavísindasvið Háskóla Íslands, segir að með tilliti til þessa háa kostnaðar væri fyllsta ástæða til að gera úttekt á árangri sérkennslu. Ólafur Loftsson, formaður Félags grunnskólakennara, segir þetta háa hlutfall sérkennslunemenda til marks um að núverandi skólastefna virki ekki sem skyldi.