Sala á fatnaði til erlendra ferðamanna á Íslandi er orðin umsvifamikil verslunargrein og er útlit fyrir að veltan verði á sjötta milljarð í ár.
Fimm verslanakeðjur eru umsvifamestar á þessum markaði og áforma þær að opna fjórar nýjar verslanir á næstu vikum. Með þeirri viðbót verða keðjurnar með 39 verslanir í sumar, auk fjölda útsölustaða.
Hátt í 300 starfsmenn munu starfa í þessum verslunum í sumar og er þá ótalinn fjöldi starfsmanna á skrifstofu og í dreifingu og framleiðslu. Í umfjöllun um þetta mál í Morgunblaðinu í dag segir Emil B. Karlsson, forstöðumaður Rannsóknaseturs verslunarinnar, ferðamenn fyrst og fremst kaupa útivistarfatnað á Íslandi.