Vel miðar við að draga fiskiskipið Kristínu GK 457 til hafnar en varðskipið Þór er með skipið í togi á leið til hafnar í Reykjavík. Gert er ráð fyrir að skipin verði komin til hafnar síðdegis í dag eða kvöld.
Stjórnstöð Landhelgisgæslunnar fékk síðdegis í gær beiðni um aðstoð frá fiskiskipinu Kristínu GK 457 sem varð vélarvana um 44 sjómílur vestur af Látrabjargi.
Varðskipið Þór sem statt var um 68 sjómílur frá vettvangi hélt þegar á staðinn og var komin að Kristínu seint í gærkvöldi. Ekkert amar að áhöfn Kristínar og er hún um borð í skipinu.
Kristín GK 457 er 400 brúttótonna fiskiskip og 42 metrar á lengd.