„Þarna er verið að nýta miklu betur illa nýtt land í kringum Kringluna," segir Hjálmar Sveinsson, formaður umhverfis- og skipulagsráðs Reykjavíkurborgar, um áform fasteignafélagsins Reita um uppbyggingu á Kringlusvæðinu. Fyrirætlanirnar séu því í takt við stefnu borgarinnar um uppbyggingu og betri landnýtingu.
Hann segir að málið sé ekki komið formlega inn á borð umhverfis- og skipulagsráðs en segir að miðað við það sem hafi komið fram í Morgunblaðinu í dag sé nú líklega hægt að fara að stíga næstu skref í átt að framkvæmdum. Hingað til hafi málið einungis verið á hugmyndastigi.
Í umfjöllun Morgunblaðsins kom fram að stefnt sé að því að byggja allt að 100 þúsund fermetra af atvinnu- og íbúðarhúsnæði við Kringluna sem nú sé nú rúmir 50 þúsund fermetrar og yrði þetta því sennilega mesta uppbygging verslunarhúsnæðis hér á landi.
Á meðal þess sem yrði byggt væru verslanir og skrifstofur, nýtt hótel en einnig að reisa allt að 250 íbúðir við Kringluna.
Grein mbl.is: Þrefalda Kringlusvæðið