Tugmilljóna rekstrarafgangur Landspítalans er ekki til kominn af góðu heldur spöruðu verkföll á síðasta ári ríkisvaldinu launakostnað upp á hundruð milljóna króna sem endurspeglast nú í afkomutölum. Þetta segir BHM, en félagsmenn þeirra voru meðal þeirra sem fóru í verkföll á síðasta ári.
„Ljóst er að ef ekki hefði komið til þessara verkfalla hefði mikill halli orðið á rekstrinum. „Jákvæð“ rekstrarniðurstaða spítalans á síðasta ári er því ekki komin til af góðu, enda er hún fengin á kostnað starfsfólks og með skertri þjónustu við sjúklinga,“ segir í tilkynningu frá félaginu.
Vekur BHM sérstaklega athygli á ákvörðun spítalans um að greiða ljósmæðrum ekki laun fyrir vinnuframlag þeirra í verkfallinu. Bandalagið hefur gert alvarlegar athugasemdir við þessa ákvörðun og fimm ljósmæður hafa nú höfðað mál gegn ríkinu, enda mikið réttlætismál að fá henni hnekkt, að sögn félagsins.