Áætlað er að fjárfesting í ferðaþjónustu hafi numið 62 milljörðum á síðasta ári. Það er um fimmtungur af heildaratvinnuvegafjárfestingu ársins. Kemur þetta fram í úttekt Samtaka ferðaþjónustunnar (SAF).
„Já, en nú má kannski segja að fjárfestingin sé afleiðing mikillar eftirspurnar á undanförnum árum og það eru væntingar um að hún haldi áfram,“ segir Helga Árnadóttir, framkvæmdastjóri SAF þegar hún er spurð í Morgunblaðinu í dag hvort aukin fjárfesting sé bein afleiðing fjölgunar ferðamanna.
Á síðasta ári komu tæplega 1,3 milljónir erlendra ferðamanna til Íslands, tæplega 30% fleiri en árið áður. Búist er við enn frekari fjölgun í ár og því kemur það skýrsluhöfundum ekki á óvart að fjárfesting í atvinnugreinum tengdum ferðaþjónustu vegi þungt í atvinnulífinu.