Bjarni Benediktsson, fjármála- og efnahagsráðherra, segist ekki sjá annað en ágætis gangur sé í þinglegri meðferð húsnæðisfrumvarpa Eyglóar Harðardóttur félagsmálaráðherra og menn ættu að spara sér að fella dóma um framgang frumvarpanna á meðan svo er.
Þetta sagði fjármálaráðherra þegar hann var spurður hvað hann segði um þau orð Gylfa Arnbjörnssonar, forseta Alþýðusambands Íslands, á 1. maí að forsendur kjarasamninga myndu bresta ef húsnæðisfrumvörp Eyglóar Harðardóttur næðu ekki fram að ganga á yfirstandandi þingi.
Spurður hvort hann teldi þá að ekkert ætti að geta komið í veg fyrir það að húsnæðisfrumvörpin yrðu að lögum fyrir næstu alþingiskosningar sagði Bjarni: „Það er að minnsta kosti allt of snemmt að fella einhverja dóma um það á meðan þingið er með málin í eðlilegri efnislegri meðferð.“