Samtökin No Borders Iceland hafa óskað eftir viðtali við Ólöfu Nordal innanríkisráðherra vegna máls flóttamannsins Eze Henry Okafor, sem vísað var úr landi í síðustu viku. Eze kom fyrst hingað til lands fyrir um fjórum árum síðan eftir að hafa flúið hryðjuverkasamtökin Boko Haram í Nígeríu.
Frétt mbl.is: Flúði undan Boko Haram til Íslands
Hjalti Hrafn Hafþórsson, hjá No Borders Iceland, segir að Ólöf sé vön að láta ekkert í sér heyra um mál af þessu tagi heldur reyni hún að gæta hlutleysis. „Það gengur ekki að hún taki ekki ábyrgð á því sem stofnanir undir hennar ráðuneyti gera,“ segir Hjalti.
Hjalti segir samtökin vera í stöðugu sambandi við Eze í Svíþjóð og reyna þau að aðstoða hann við að finna út hvaða lagalegu stöðu hann hefur í landinu. „Hún virðist afar takmörkuð. Það er verið að breyta löggjöfinni þar í landi þannig að flóttamenn þar fá engan stuðning eftir 1. júní,“ segir Hjalti en segir það óljóst hvort senda eigi hann úr landi 1. júní eða ekki.
Frétt mbl.is: Handteknar í Icelandair-vél
Frétt mbl.is: Hugsanlega ákærðar fyrir flugrán
„Við bíðum eftir að hann hafi samband við lögfræðing í dag. Þetta er allt pínu snúið,“ segir hann.