Eignir heimila hér á landi jukust umtalsvert í fyrra samkvæmt skattframtölum á sama tíma og skuldir þeirra minnkuðu.
Þetta er meðal þess sem fram kemur á yfirliti fjármálaráðuneytisins yfir niðurstöður álagningar ríkisskattstjóra, sem um er fjallað í Morgunblaðinu í dag.
Alls töldu heimilin fram eignir upp á 4.535 milljarða kr. á framtölum fyrir síðasta ár og jukust þær um 7,6% frá fyrra ári. Þar vegur aukið verðmæti fasteigna þungt en heimilin áttu um síðustu áramót fasteignir fyrir 3.277 milljarða kr. og jókst verðmæti þeirra um 8,2% á milli ára. Í fyrra fjölgaði íbúðareigendum um 820 frá árinu á undan.