Nýlegur úrskurður kjararáðs um hækkun launa hjá nokkrum forstöðu- og nefndarmönnum hjá hinu opinbera gæti sett kjaraviðræður opinberra starfsmanna í uppnám.
Kjarasamningur grunnskólakennara rann út í maí og kjarasamningur framhaldsskólakennara rennur út nú í október. Það er því ljóst að harðar kjaraviðræður eru framundan, að því er fram kemur í umfjöllun um mál þetta í Morgunblaðinu í dag.
Ólafur Loftsson, formaður Félags grunnskólakennara, segir ákvörðun kjararáðs furðulega og þvert á það sem aðrir aðilar á vinnumarkaði hafi verið að semja um. Guðríður Arnardóttir, formaður Félags framhaldsskólakennara, segir úrskurðinn gefa tóninn fyrir komandi viðræður.