Helmingur ökumanna sem óku eftir Austurbergi í suðurátt í dag ók of hratt eða yfir afskiptahraða. Lögregla segir tölurnar sláandi. Meðalhraði hinna brotlegu var 43 km/klst. en hámarkshraði í götunni er 30 km/klst.
Vöktun lögreglu í Austurbergi í dag er liður í umferðareftirliti við grunnskóla á höfuðborgarsvæðinu.
Alls fóru 114 ökumenn um Austurbergið í suðurátt, á móts við Hólabrekkuskóla, á meðan eftirliti lögreglu stóð. 57 reyndust brotlegir. Sá sem ók hraðast mældist á 57 km/klst.
Það vill svo ótrúlega til að sama átti við í Norðurfelli þar sem fylgst var með ökutækjum sem ekið var í vesturátt, við Gyðufell. Þar gerðust 55 brotlegir.
„Á einni klukkustund, eftir hádegi, fóru 111 ökutæki þessa akstursleið og því ók helmingur ökumanna, eða 50%, of hratt eða yfir afskiptahraða. Meðalhraði hinna brotlegu var 45 km/klst. en þarna er 30 km hámarkshraði. Sjö óku á 50 km hraða eða meira, en sá sem hraðast ók mældist á 59,“ segir í tilkynningu frá lögreglunni á höfuðborgarsvæðinu.