„Þetta er gríðarlegur skellur. Það er alveg sama hvort þú ert verkamaður eða forritari, þú myndir ekki þola vel yfir 10% lækkun á launum þínum.“
Þetta segir Sæþór Gunnsteinsson, sauðfjárbóndi í Presthvammi í Aðaldal, um ákvarðanir Norðlenska og fleiri sláturleyfishafa að lækka verð til bænda í haust. Greitt er 10% lægra verð fyrir dilka en í fyrra og 38% lægra verð fyrir fullorðið fé.
Ákvörðun sláturleyfishafa hefur kallað fram sterk viðbrögð í sveitum landsins. „Við höfum okkar tekjur af innlegginu og þetta er því bein tekjuskerðing,“ segir Guðrún Ragna Einarsdóttir, bóndi á Skjöldólfsstöðum á Jökuldal. Hún leggur afurðir sínar inn á Vopnafirði og hefur sláturhúsið þar tilkynnt 12% verðlækkun í bréfi til framleiðenda. „Verðlækkun kemur ekki sérstaklega á óvart, hún var yfirvofandi, en ég átti ekki von á að hún yrði svona mikil,“ segir Guðrún í umfjöllun um mál þetta í Morgunblaðinu í dag.