Tveir piltar frá Alsír og Marokkó komu til Breiðdalsvíkur í morgun og óskuðu þar eftir hæli á Íslandi.
Að sögn lögreglunnar á Egilsstöðum höfðu þeir komið með Norrænu til landsins og farið til Breiðdalsvíkur á puttanum og fótgangandi um 120 kílómetra leið.
Piltarnir munu fá viðeigandi málsmeðferð í samstarfi við Útlendingastofnun.
Sökum aldurs voru barnaverndaryfirvöld einnig upplýst um þeirra hagi en piltarnir sögðust vera 16 og 17 ára gamlir.
Töluvert margir hælisleitendur komu til landsins með Norrænu í vor en síðan þá hefur verið lítið um slíkar heimsóknir, að sögn lögreglunnar.