Starfsstöðvum fyrirtækis í byggingarstarfsemi í Reykjavík og á Suðurnesjum var lokað sl. þriðjudag í umfangsmiklum aðgerðum fulltrúa Ríkisskattstjóra og lögreglu.
Ástæðan var sú að fyrirtækið hafði ekki skilað staðgreiðslu af launum starfsfólks og ekki staðið skil á virðisaukaskatti. Nema fjárhæðirnar á annað hundrað milljónum króna.
Um er að ræða undirverktaka í byggingarstarfsemi á framkvæmdasvæðinu við Bláa lónið skv. heimildum Morgunblaðsins. Alls var ríflega 30 starfsmönnum vísað af viðkomandi starfsstöðvum, allt að 20 starfsmönnum í Reykjavík og 12 starfsmönnum suður með sjó að sögn Sigurðar Jenssonar, yfirmanns eftirlitssviðs Ríkisskattstjóra. „Þetta var ein stærsta aðgerð sem við höfum farið í á þessu sviði,“ segir Sigurður.
,,Tæki og verkfæri voru sett inn í vinnuskúra og gáma sem voru síðan innsiglaðir og hið sama var gert við bifreiðar,“ segir hann í Morgunblaðinu í dag.