Fljótsdalshreppur hefur í samvinnu við Arkitektafélag Íslands auglýst hönnunarsamkeppni um aðstöðubyggingu fyrir ferðamenn við Hengifossá í Fljótsdal.
Markmið samkeppninnar er að fá fram góða lausn til þess að bæta aðstöðu ferðafólks á svæðinu og um leið að stuðla að vernd náttúruperlna og umhverfis þeirra. Samkeppnin tekur því einnig til nánasta umhverfis byggingarinnar og tillagna um hvíldar- og útsýnisstaði, hlið og merkingar.
Hengifoss í Fljótsdal er einn vinsælasti og fjölfarnasti ferðamannastaður á Austurlandi með gljúfri sínu og stuðlaberginu við Litlanesfoss í sömu á. Gert er ráð fyrir að í það minnsta 70 þúsund manns hafi gengið að Hengifossi á þessu ári, segir í tilkynningu. Göngustígar og önnur aðstaða fyrir ferðamenn hefur ekki byggst upp í samræmi við fjölgun ferðamanna.