Það hallar mikið á konur í trúnaðarstörfum í verkalýðshreyfingunni þegar litið er á hlutfall kvenna og karla í stjórnum og ráðum innan ASÍ.
Kynjabókhald ASÍ, sem lagt verður fram á þingi sambandsins sem hefst í dag, leiðir m.a. í ljós að hlutur kvenna í miðstjórn ASÍ hefur minnkað fremur en hitt á umliðnum árum og eru þær nú 27% fulltrúa í miðstjórninni. Konur voru til samanburðar 40% fulltrúa í miðstjórn á árunum 2008-2009.
Konur eru 46% allra félagsmanna innan Alþýðusambandsins. Hlutur þeirra í stjórnum aðildarfélaga og deilda sambandsins er hins vegar mun minni eða 31% stjórnarmanna í dag. Samtals eru 326 karlar stjórnarmenn í aðildarfélögum ASÍ en konurnar eru 146, að því er fram kemur í umfjöllun um mál þetta í Morgunblaðinu í dag.