Stúdentafélög allra háskóla á Íslandi standa nú fyrir undirskriftasöfnun á vefslóðinni www.haskolarnir.is þar sem þess er krafist að stjórnvöld setji menntamál í forgang og fylgi settri stefnu um fjármögnun háskólakerfisins.
Í fréttatilkynningu frá stúdentafélögunum segir að nemendur hafi allt of lengi þurft að búa við undirfjármögnun háskólanna, sem bitni m.a. á kennslu og aðstöðu í háskólunum og ekki síður framþróun í samfélaginu.
„Enn fremur er ljóst að ef ekki er lagt meira fé til reksturs háskólakerfisins þarf á endanum að fækka nemendum og draga úr fjölbreytileika í námsframboði,“ að því er segir í tilkynningunni.
Þegar hafa um 5.000 manns skrifað undir áskorunina, sem svarar til um fjórðungs allra háskólanema í landinu.
Í áskoruninni eru stjórnvöld hvött til að hækka framlag ríkisins til skólanna þannig að árið 2020 verði það orðið jafnhátt framlögum annarra Norðurlandaþjóða á hvern háskólanema.
„Viðvarandi undirfjármögnun háskólanna dregur úr framþróun í samfélaginu og samkeppnishæfni landsins. Enn fremur er ljóst að ef ekki er lagt meira fé til reksturs háskólakerfisins þarf á endanum að fækka nemendum og draga úr fjölbreytileika í námsframboði,“ segir í tilkynningunni.