Umsóknum til undanþágunefndar grunnskóla tók aftur að fjölga skólaárið 2012-2013 en nefndin tekur til meðferðar umsóknir skólastjóra um heimild til að lausráða starfsmann, sem ekki hefur leyfi menntamálaráðherra til að nota starfsheitið grunnskólakennari.
Þetta kemur fram í samantekt Menntamálastofnunar sem birt var á vef þeirra í gær. Þegar umsóknum til nefndarinnar fjölgar er það til merkis um að í batnandi ástandi á vinnumarkaði leiti kennarar frekar í önnur störf.
Til samanburðar fækkaði umsóknum umtalsvert á árunum 2009-2012 í kjölfar efnahagshrunsins árið 2008. Áhrif þrenginga á atvinnumarkaði í kjölfar hrunsins eru því talin sýnileg í samantektinni, að því er fram kemur í Morgunblaðinu í dag.