Lögreglunni á höfuðborgarsvæðinu barst tilkynning á fjórða tímanum í nótt um stuld á farsíma. Í ljós kom að maður sem hafði mætt í eftirpartý í íbúð við Laugaveg hafði þakkað fyrir boðið með því að stela síma húsráðanda.
Um átta í gærkvöldi var tilkynnt til lögreglunnar um umferðaróhapp við Skeljung á Bústaðavegi en ekið hafði verið á bifreið og tjónvaldur stakk af. Sá var stöðvaður af lögreglu skömmu síðar og reyndist hann ölvaður undir stýri.
Um eitt í nótt var síðan ferð ölvaðs ökumanns stöðvuð á Sæbraut.
Lögreglan hafði afskipti af tveimur ungum mönnum á heimili við Laugarnesveg vegna vörslu fíkniefna um hálf eitt í nótt. Um klukkan 19 voru einnig höfð afskipti af manni á heimili í Kópavogi vegna vörslu fíkniefna.