Á fimmta tug sérhæfðra björgunarsveitarmanna eru nú við leit í nágrenni Selvogsvita á Reykjanesi. Lögreglan sóttist eftir aðstoð björgunarsveitanna við leit á svæðinu vegna vísbendingar sem barst um helgina og tengist rannsókn á andláti Birnu Brjánsdóttur.
Birna fannst látin í fjörunni við Selvogsvita um hádegi sunnudaginn 22. janúar. Hennar hafði þá verið saknað í átta sólarhringa.
Milt veður er á leitarsvæðinu, bjart og hlýtt.
Leitarhópurinn er úr björgunarsveitum á Suðurlandi, Suðurnesjum og frá höfuðborgarsvæðinu.
Leitin hófst kl. 13 í dag og mun standa fram í myrkur ef þurfa þykir. Drónar eru m.a. notaðir við leitina.
Grímur Grímsson yfirlögregluþjónn sagði við mbl.is í morgun að óskað hafi verið eftir aðstoð björgunarsveitanna til að fylgja eftir vísbendingu sem hann vildi ekki tjá sig um hvers eðlis væri. „Við ætlum að kanna það hvort það finnist þarna hlutir sem gætu tengst málinu,“ sagði Grímur.
Frétt mbl.is: Leit við Selvogsvita í dag
Karlmaðurinn sem er enn í gæsluvarðhaldi, grunaður um að hafa ráðið Birnu bana, hefur ekki verið yfirheyrður um helgina og ekki hefur verið tekin ákvörðun um hvenær yfirheyrslur yfir honum hefjast að nýju.
Grímur segir að játning mannsins liggi ekki fyrir í málinu.
Hann segir að enn sé ekki hægt að segja til um hvenær rannsókn lögreglunnar á málinu ljúki og það verði sent áfram til ákæruvaldsins.