Miklar umræður og fundahöld eru í sérsamböndum verkalýðshreyfingarinnar og á vettvangi ASÍ þessa dagana um endurskoðun kjarasamninganna en aðeins 15 dagar eru til stefnu þar til ákvörðun á að liggja fyrir.
Þó miklar líkur séu taldar á að niðurstaðan verði sú að forsendur samninganna séu brostnar og þeim verði mögulega sagt upp halda margir í verkalýðshreyfingunni því fram að óvarlegt sé að opna samningana núna, að því er fram kemur í fréttaskýringu um kjaramálin í Morgunblaðinu í dag.
Í sumar og haust komi aðrir hópar í kjölfarið, því samningar lækna, BHM og hjúkrunarfræðinga losna í sumar og kennarasamningar í haust. Sumum innan raða ASÍ hrýs hugur við að opna alla samninga við þessar kringumstæður ef viðbúið er að í kjölfarið komi aðrir hópar og semji um meiri hækkanir.