Bandarísku hjónin Richard og Shasten Hildebrand komu til Íslands í fyrsta skipti í síðustu viku en þau hafði lengi langað til að sækja landið heim. Richard og Shasten giftu sig í New York í byrjun febrúar og ákváðu þau að skiptast á brúðkaupsheitum hér á landi. Brúðkaupsmyndatakan fór einnig fram á Íslandi en að henni lokinni ákvað parið að gefa brúðarkjólinn til Rauða krossins á Íslandi.
„Í stað þess að pakka kjólnum og setja hann í poka vildum við að hann færi á gott heimili og að einhver hlyti sömu góðu örlög og við. Við höfum verið saman í þrjú ár og við vildum færa einhverjum ást okkar,“ sagði Richard í samtali við mbl.is en blaðamaður var fyrir tilviljun í verslun Rauða krossins á Laugaveginum þegar parið kom þangað með kjólinn.
„Við vorum búin að skipuleggja þessa ferð til Íslands og ætluðum að gifta okkur í New Orleans um páskana. Við fundum fyrir þessari töfrandi tengingu við Ísland alveg frá því að við bókuðum ferðina svo við ákváðum að það væri rétti staðurinn til að skiptast á persónulegum brúðkaupsheitum og til að fullkomna andlega tengingu hjónabandsins,“ sagði Richard.
Shasten sagði einu ástæðu þess að þau létu gefa sig saman í New York fyrst vera vegna allrar pappírsvinnunnar sem hefði fylgt, hefðu þau gift sig á Íslandi.
„Ísland er alveg sérstakt í okkar huga núna. Þetta var frábært frí en líka þýðingarmikið fyrir okkur því við skiptumst ekki á persónulegum brúðkaupsheitum í New York, þar fórum við bara í dómshúsið. Hérna höfðum við persónulega athöfn, fyrir okkur. Ég nota kjólinn ekki aftur og það var táknrænna fyrir okkur að skilja hann eftir [á Íslandi]. Vonandi mun einhver annar nota hann,“ sagði Shasten.
Brúðkaupsmyndatakan fór fram á Reykjanesinu en myndirnar tók breski ljósmyndarinn Rebecca Douglas.
„Við vorum í brúðkaupsfötunum okkar og tókum helling af myndum víðs vegar á Reykjanesinu. Svo skiptum við yfir í íslensku peysurnar okkar, svona til þess að fá í okkur hlýjuna, og skiptumst á brúðkaupsheitum yst á nesinu.“
Richard og Shasten voru á landinu í um viku og sögðust vera afar ánægð með ferðina. Auk myndatökunnar á Reykjanesinu höfðu þau farið Gullna hringinn og í norðurljósaferð þegar blaðamaður talaði við þau fyrir helgi. Þá voru þau á leið norður á Mývatn en Richard hafði lengi dreymt um að skoða Dimmuborgir.
„[Ísland] er staður sem okkur bæði hefur alltaf langað til að sjá. Allt landið er töfrandi […] það er eins og það sé ekki einu sinni hluti af jörðinni, okkur finnst þetta svo magnað. Ameríka er falleg […] en ekkert miðað við það sem við sjáum hér.“
Ásta S. Hreiðarsdóttir, verslunarstjóri verslunar Rauða krossins við Laugavegi 12, sagðist ekki hafa upplifað það áður að einhver komi með brúðarkjól í búðina til hennar. Þó væru margir sem gæfu brúðarkjólana sína til samtakanna en þeir færu þá venjulega í gegnum flokkun og væri svo haldið til haga fyrir sérstaka brúðardaga.
„Ég hef ekki tekið svona áður en mér fannst ég ekki geta sent þau í burtu með þetta. Þetta var svolítið sérstakt, það er svo gaman þegar svona kemur.“
Þess má geta að brúðarkjóllinn er ekki lengur í versluninni en starfsmanni sem blaðamaður ræddi við í dag þótti líklegt að það væri vegna þess að einhver hafi þegar keypt hann.