Þrír menn lentu í snjóflóði sem féll í Botnsdal við Súgandafjörð um hálfáttaleytið í gærkvöldi og slasaðist einn þeirra og var fluttur á sjúkrahús.
Að sögn lögreglunnar á Vestfjörðum þá voru fjórir menn á fjallaskíðum þegar flóðið féll. Einn þeirra náði að skíða frá flóðinu, en hinir þrír urðu undir því. Náðu tveir þeirra að losa sig sjálfir úr flóðinu og losuðu þeir síðan í sameiningu þann þriðja. Sá slasaðist, en ekki lífshættulega, og var hann fluttur á sjúkrahúsið á Ísafirði.
Að sögn lögreglu var flóðið nokkuð breitt, en snjór hefur safnast í fjöll og er töluverð snjóflóðahætta á þessum slóðum samkvæmt upplýsingum Veðurstofu.