Pósturinn segir að fyrirtækið hafi margoft bent Þjóðskrá á að ekki sé æskilegt að senda vegabréf með almennum bréfapósti. Þetta kemur fram í tilkynningu frá fyrirtækinu.
Pósturinn benti á að það er sendandinn, Þjóðskrá, sem velur þessa leið en almennur bréfapóstur er hvorki rekjanlegur né tryggður.
„Vegabréf eru send í almennum bréfapósti og er það sendandi sem velur þá þjónustuleið. Pósturinn hefur margoft bent Þjóðskrá á að almennur bréfapóstur er hvorki rekjanlegur né tryggður í þessu sambandi og vakið athygli á því að senda ætti vegabréf og önnur persónuleg skilríki í rekjanlegum pósti en ekki hefur verið brugðist við þessum ábendingum,“ segir í tilkynningunni.