Óski verjandi ekki eftir frekari gagnaöflun eða ef farið er fram á nýjar rannsóknaaðgerðir má gera ráð fyrir því að aðalmeðferð í morðmáli Birnu Brjánsdóttur fari fram í maí. Þetta sagði Kolbrún Benediktsdóttir, aðstoðarhéraðssaksóknari og saksóknari málsins, í samtali við mbl.is eftir þingfestingu málsins í dag.
Maðurinn sem grunaður er um morðið og hefur setið í gæsluvarðhaldi frá því 17. janúar heitir Thomas Møller Olsen. Hann neitaði í morgun báðum ákæruliðum málsins, en í þeim fyrri er honum gefið að sök að hafa banað Birnu. Í síðari lið ákærunnar er hann ákærður fyrir stórfellt fíkniefnalagabrot með því að hafa reynt að smygla rúmlega 23 kg af kannabisefnum, sem hann hafði komið fyrir í káetu sinni um borð í grænlenska togaranum Polar Nanoq.
Áður hafði komið fram í fjölmiðlum að maðurinn hefði játað smyglið á kannabisefnunum. Kolbrún segist ekki vita um ástæðu þess að hann neiti því núna. „Hvað það er sem hann er að neita, gæti verið liður í verknaðarlýsingunni. Ég átta mig ekki á því, en það mun væntanlega skýrast í næstu fyrirtöku í málinu,“ segir Kolbrún.
Verjandi Olsen óskaði eftir því að fá frest til að fara yfir gögn málsins og mögulega skila greinargerð. Fallist var á það og verður næsta fyrirtaka málsins 25. apríl. Kolbrún segir að komi ekkert óvænt upp á gæti aðalmeðferð verið ákveðin þá. „Ef ekki er gerð krafa um frekari rannsóknaraðgerðir eða gagnaöflun þá má reikna með að dagur fyrir aðalmeðferð verði ákveðinn í næstu fyrirtöku,“ segir hún og bætir við: „Þegar maðurinn er í gæsluvarðhaldi er þessu flýtt eins og hægt er. Mér finnst ekki ólíklegt að reynt verði að horfa til maí varðandi aðalmeðferð.“