Hampiðjan í Ástralíu hefur náð samningi um sölu á 120 rækjutrollum til Austral Fisheries, eins stærsta útgerðarfyrirtækis í Ástralíu.
Aðeins tæp tvö ár eru síðan útibú Hampiðjunnar var opnað í Ástralíu eða í október árið 2015 og er fyrirtækið þegar orðið leiðandi í sölu á veiðarfærum í áströlskum sjávarútvegi, að því er fram kemur í umfjöllun um mál þetta í Morgunblaðinu í dag.
„Við seljum veiðarfæri um alla Ástralíu. Allar stærstu útgerðirnar versla eingöngu við okkur,“ segir Þorsteinn Benediktsson, framkvæmdastjóri Hampidjan Australia. Fyrirtækið er að hans sögn orðið stærsta fyrirtæki á markaði í Ástralíu með fiskitroll, rækjutroll og allt sem tengist togveiðarfærum.
„Við bjóðum upp á mikil gæði og góða þjónustu. Þótt vörurnar séu aðeins dýrari en vörur keppinauta gengur okkur vel að koma þeim á markað.“
Þorsteinn segir tækifæri fyrir Hampiðjuna í námu- og olíu- og gasiðnaðinum en fyrirtækið bjóði t.d. svokallaða ofurkaðla, DynIce, sem eru framleiddir úr dyneema-efni en það er sterkara en stál. Með slíkum köðlum má t.d. draga hundraða tonna námutrukka í áströlskum námum, í stað þess að nota þunga stálvíra eða keðjur. „Hér í Ástralíu er mikill fjöldi skipa sem flytja gáma, kol, olíu og gas og því er mikill markaður fyrir t.d. landfestar og dráttartaugar.“
Þorsteinn segir einnig sóknarfæri í áströlsku fiskeldi en við kaup fyrirtækisins á færeyska fyrirtækinu Von P/F komi mikil sérhæfing og þekking í fiskeldi.