Innlent | mbl | 21.5.2017 | 14:00 | Uppfært 14:52

Hlaupa fyrir fjölskyldu Mikaels

Grændalur milli Hveragerðis og Ölkelduháls. mbl.is/Rax

Skokkhópur Hamars í Hveragerði mun standa fyrir 24 km utanvegahlaupi og 5 km hlaupi 25. maí næstkomandi. Hlaupa á til minningar um ungan dreng, Mikael Rúnar Jónsson, sem lést af slysförum í Hveragerði 1. apríl síðastliðinn.

Allur ágóði hlaupsins mun renna til fjölskyldunnar. Foreldrar hans hafa verið dyggir félagar í hlaupahópnum.

„Við vildum líka bjóða upp á styttri vegalengd svo fleiri geti tekið þátt og styrkt gott málefni. Hvort sem fólk hleypur eða labbar þessa 5 km í fallegu umhverfi í Hveragerði,“ segir Sverrir Ingibjartsson, einn af skipuleggjendum hlaupsins.

Hlaupið nefnist Ölkelduhlaup og dregur nafn sitt Ölkelduhnjúk sem hlaupið er upp að og í kringum í Reykjadal. Sá staður er mjög vinsæll meðal erlendra ferðamanna.

Þetta er ekki í fyrsta skipti sem Ölkelduhlaup er haldið en þó fyrsta styrktarhlaupið.

„Yfirleitt hafa tekið þátt um 30 til 50 manns. Ég á von á að það verði fleiri sem taka þátt núna. Það verða líka eflaust margir sem hlaupa 5 km og tilvalið fyrir þá sem eru að byrja að hlaupa,“ segir Sverrir.

Hann tekur fram að báðar hlaupaleiðirnar séu mjög fallegar. Í styttri vegalengdinni er lagt af stað frá Lystigarðinum í Hveragerði og hlaupið um skógræktarsvæði undir Hamrinum.

Hægt er að skrá sig á hlaup.is í utanvegahlaupið sem kostar 3.000 krónur en 3.500 krónur ef skráð er á staðnum. Tekið er við skráningu í 5 km hlaupið á staðnum og er lágmarksgjald 1.000 krónur.