Guðmundar- og Geirfinnsmálið fer fyrir Hæstarétt núna í lok vikunnar eða í næstu viku, að sögn Davíðs Þórs Björgvinssonar, setts saksóknara í málinu. Reiknað er með að málflutningur fari ekki fram í málinu fyrr en í vetur. Þetta kemur fram í Fréttablaðinu.
Þar kemur einnig fram að Davíð Þór verður væntanlega skipaður dómari við Landsrétt sem tekur til starfa um áramótin. Ekki liggur fyrir hvaða áhrif sú skipan hefur á stöðu hans sem setts saksóknara.
Fyrirköll eru tilbúin í Guðmundar- og Geirfinnsmálum. Endurupptökunefnd féllst í febrúar á endurupptökubeiðnir er varða fimm menn sem sakfelldir voru í tengslum við mannshvarfsmálin tvö á áttunda áratugnum. Nefndin féllst ekki á endurupptöku sjötta sakborningsins, Erlu Bolladóttur, sem var sakfelld á sínum tíma fyrir að bera rangar sakir á menn við rannsókn málanna.