Ráðgert er að reisa tíu smáhýsi í „fínni kantinum“ á túninu á Rangá í Kaldakinn í Þingeyjarsveit og hyggjast eigendurnir bjóða þar upp á gistingu, einkum hönnuðum og listafólki, jafnt erlendu sem innlendu.
Róshildur Jónsdóttir, hönnuður og landeigandi, fluttist nýlega á gamlar heimaslóðir sínar á Rangá ásamt eiginmanni sínum, Snæbirni Þór Stefánssyni, en bæði eru vöruhönnuðir. Þau hyggjast gera vinnustofur í gömlu fjárhúsunum og gallerí og mögulega veitingaþjónustu í hlöðunni.
Tillaga að breyttu skipulagi jarðarinnar er nú til kynningar í Þingeyjarsveit.