„Ég er mjög spenntur. Það er ótrúlega gaman að fá að vera partur af þessum heimi,“ segir Ólafur Darri Ólafsson, en eins og mbl.is greindi frá munu hann og Ingvar E. Sigurðsson fara með hlutverk í nýrri Fantastic Beasts mynd sem kemur út í nóvember 2018.
Frétt mbl.is: Ólafur Darri og Ingvar í Fantastic Beasts
Tökur á myndinni hófust í dag í kvikmyndaveri Warner Bros. í Leavesden í Englandi. Ekki náðist í Ingvar við vinnslu fréttarinnar, en samkvæmt heimildum mbl.is er hann staddur í Englandi að undirbúa tökur myndarinnar.
Í samtali við mbl.is segist Ólafur Darri vera mikill Harry Potter aðdáandi, og því sé einstaklega skemmtilegt að fá að taka þátt í verkefninu. „Þetta er risastórt dæmi,“ segir hann.
Kvikmyndin er einskonar forleikur fyrir söguna af galdrastráknum Harry Potter. Handrit hennar er skrifað af höfundi bókanna, J.K. Rowling og hún á sér stað í sama galdraheimi og Harry Potter bækurnar, en sjö áratugum fyrr.
Fyrirhugað er að Warner Bros muni gefa út alls fimm Fantastic Beasts myndir, en sú fyrsta kom út á síðasta ári. Myndirnar gerast á árunum 1926 til 1945, en sögusvið næstu myndar er New York, London og París. Leikstjóri síðustu fjögurra Harry Potter myndanna, David Yates og framleiðandinn David Heyman eru ábyrgir fyrir því að glæða handrit Rowling lífi.
Mun Ingvar fara með hlutverk mannaveiðara að nafni Grimmson og Ólafur Darri fara með hlutverk Skender, eiganda töfrasirkuss. Þar slást þeir í hóp heimsfrægra leikara á borð við Eddie Redmayne, Johnny Depp, Colin Farrell, Zoe Kravitz, Jude Law og fleiri. Greint var frá þessu fyrr í dag á vef Pottermore.
Ólafur Darri og Ingvar léku síðast saman í sjónvarpsþáttunum Ófærð, en báðir eiga þeir farsæla ferla að baki. Ólafur Darri hefur farið með hlutverk í þó nokkrum kvikmyndum og sjónvarpsþáttum vestanhafs, til að mynda True Detective og The Secret Life of Walter Mitty, auk þess að leika í fjölmörgum íslenskum kvikmyndum og sjónvarpsþáttum.
Þá lék Ingvar í stórmyndinni Everest auk þess að hafa árið 2002 leikið ásamt Harrison Ford og Liam Neeson í kvikmyndinni K-19: The Windowmaker. Hann hefur einnig leikið í fjölmörgum íslenskum kvikmyndum á borð við Engla Alheimsins, Mýrinni, Hross í oss og Þröstum.