Breytingar eru fram undan hjá framkvæmdastjórn Sólheima eftir að Guðmundur Ármann Pétursson, sitjandi framkvæmdastjóri, sagði upp störfum þar í síðustu viku.
Fjármálastjóri, Einar Páll Bjarnason, mun tímabundið taka við starfi framkvæmdastjóra þar til nýr framkvæmdastjóri verður kosinn í haust. Sagt var frá því að Guðmundur væri að hætta í Fréttablaðinu í morgun.
Guðmundur Ármann Pétursson hefur gegnt starfi framkvæmdastjóra á Sólheimum í nær 29 ár en þar áður vann hann þar fjölbreytt störf. Hann situr einnig í sveitarstjórn Grímsnes- og Grafningshrepps ásamt því að vera í stjórn Þroskahjálpar á Suðurlandi. Hann er með mastersgráðu í umhverfis- og orkufræðum frá University of East London ásamt því að vera rekstrarfræðingur frá Háskólanum á Bifröst.