Icelandair mun í vetur loka síðustu erlendu söluskrifstofum sínum. Guðmundur Óskarsson, framkvæmdastjóri sölu- og markaðssviðs Icelandair, segir þetta lið í þeirri stefnubreytingu að færa sölu- og markaðsstarf félagsins heim.
Með því að bæta samhæfingu markaðs- og söludeilda og sérfræðinga í nettækni megi efla sóknina á erlenda markaði. Hægt verði að taka ákvarðanir með skjótari hætti og bregðast hraðar við breytingum. Það muni skila auknum tekjum.
Í umfjöllun um mál þetta í Morgunblaðinu í dag segir Guðmundur innkomu Norwegian og kanadíska flugfélagsins WestJet á markaðinn fyrir flug yfir Norður-Atlantshafið hafa sett aukna pressu á verð. Með öflugri netdeild geti Icelandair betur nýtt styrk sinn sem flugfélag sem býður fjölbreytt framboð á upplifun og þjónustu.