Hveragerðisbær ætlar að byggja íbúðarhúsnæði í austurhluta bæjarins á lóðum þar sem Eden og Tívolíið voru áður. Fasteignaþróunarfélagið Suðursalir ehf. stendur að framkvæmdunum í samstarfi við Arion banka.
Nýtt deiliskipulag var samþykkt á dögunum með því markmiði að byggja upp miðbæjarkjarna bæjarins og um leið auka lóðaframboð til íbúðabygginga. Í haust munu framkvæmdir hefjast á Eden-reitnum þar sem reist verða tveggja til þriggja hæða fjölbýlishús. Áætlað er að byggja á svæðinu um 60-70 tveggja til fjögurra herbergja íbúðir.
Gísli Steinar Gíslason hjá Suðursölum ehf. segir að íbúðirnar vera svar við brýnni þörf á litlum og meðalstórum íbúðum á hagstæðu verði. Eru þær meðal annars hugsaðar fyrir ungt fólk sem er að kaupa sitt fyrsta húsnæði eða aðila á leigumarkaði sem hafa áhuga á að færa sig í eigið húsnæði.
Í kjölfarið verður ráðist í framkvæmdir á Tívolí-lóðinni þar sem áætlað er að byggja einnar til þriggja hæða hús með blandaðri þjónustu- og verslunarstarfsemi ásamt íbúðum á efri hæðum. Áætlaður framkvæmdatími eru þrjú til fimm ár.
Aldís Hafsteinsdóttir, bæjarstjóri í Hveragerði, segir framkvæmdirnar mikið fagnaðarerindi. „Hveragerði er blómstrandi bæjarfélag og við höfum á undanförnum árum fundið fyrir aukinni eftirspurn eftir íbúðarhúsnæði í bænum en framboð hefur verið takmarkað.“