Lokað verður fyrir umferð inn á Ölfusárbrú fram til klukkan 8 eða 9 í dag miðvikudaginn 26. júlí. Umferð er á meðan beint um Eyrarbakkaveg og Þrengslaveg. Vegna óviðráðanlegra aðstæðna hafa framkvæmdir við malbikun á hringtorgi við Ölfusárbrú tafist en upphaflega var gert ráð fyrir að framkvæmdunum yrði lokið um kl. 6 í morgun. Þetta kemur fram á vef Vegagerðarinnar.
Í dag er einnig stefnt að því að malbika aðra akreinina á Suðurlandsvegi frá hringtorgi við Toyota á Selfossi í áttina að Biskupstungnabraut. Akreininni verður lokað og verður umferð stýrt framhjá. Áætlað er að framkvæmdirnar standi yfir frá kl. 7 til hádegis.
Vegagerðin varar við töluverðum viðhaldsframkvæmdum á hringvegi frá Borgarnesi að Laugarbakka í Miðfirði næstu daga. Vegfarendur geta búist við umferðarstýringu við framkvæmdasvæðið með 10-15 mínútna bið í senn.
Einnig er unnið við blettanir í Dölunum.
Vegfarendur eru beðnir að virða merkingar og hraðatakmarkanir og sýna aðgát við vinnusvæðin sem eru þröng og menn og tæki eru við vinnu mjög nálægt akstursbrautum.