Ýmislegt bendir til þess að mannvirki sem tengja má við útfararsiði og legstaði heiðinna manna hafi komið í ljós við fornleifauppgröftinn á bílastæðinu við Landssímahúsið gamla í miðbæ Reykjavíkur.
Þar í jörðu var hluti hins forna og kristna Víkurkirkjugarðar, þar sem 30 kynslóðir Reykvíkinga hvíla. Þetta staðfestir dr. Vala Garðarsdóttir fornleifafræðingur, sem stjórnaði uppgreftrinum og rannsókninni sem nú fer fram á minjunum.
Í umfjöllun um fund þennan í Morgunblaðinu í dag kemur fram, að minjarnar sem um ræðir voru að mestu leyti horfnar vegna seinni tíma framkvæmda en þó benti ýmislegt til þess að heiðin mannvirki hefðu verið þarna i jörðu fyrir rúmum 1.100 árum. Vala segir þó of snemmt og ótímabært að fullyrða slíkt.