Útlit er fyrir að rúmlega fjörutíu tegundir af jólabjór verði til sölu í ár. Það er svipað og í fyrra. Sala á jólabjór hefst í Vínbúðunum miðvikudaginn 15. nóvember en nokkru fyrr verða einhverjar tegundir komnar í sölu í fríhöfninni í Keflavík.
Sigrún Ósk Sigurðardóttir, aðstoðarforstjóri ÁTVR, segir að tæplega 800 þúsund lítrar hafi selst af jólabjór í fyrra. Árið 2015 seldust um 750 þúsund lítrar og þannig hefur þróunin verið; bæði framboð og eftirspurn hefur aukist ár frá ári. Árið 1989, árið sem bjórinn var leyfður hér á ný, seldust um 10 þúsund lítrar af jólabjór.
„Þetta er stórt sölutímabil, sennilega það stærsta af einstökum sölutímabilum,“ segir Sigrún Ósk í Morgunblaðinu í dag.