Hún var ansi óvenjuleg ein ýsan sem Onni Hu 36 landaði á Skagaströnd á dögunum. Hún er appelsínugul á litin með bleikum blæ og það vantar á hana svokallaða „kölskabletti“ - svörtu blettina sem eru fremst á hliðarrákunum beggja megin á ýsu.
Ýsan er stór og mikil og virðist hafa þrifist mjög vel. Ekki er líklegt að litabreytingin stafi af of langri veru í þara, eins og gerist með þorsk, því hún veiddist á 85 faðma dýpi í snurvoð og var þar innan um eðlilegar kynsystur sínar.
Gárungarnir á bryggjunni á Skagaströnd grínuðust með að ýsan væri bara að taka þátt í bleikum október til að minna á baráttuna gegn krabbameini kvenna. Það fengist þó líklega ekki staðist því hún var ekki með bleika slaufu.
Ýsan verður í framhaldinu send til Hafrannsóknastofnunar sem mun skoða þennan undarlega fisk.