Útlit er fyrir milt veður á kjördag. Samkvæmt veðurspá frá Veðurstofu Íslands má búast við vestlægri eða breytilegri átt á landinu öllu á laugardag og sunnudag.
Að sögn vakthafandi veðurfræðings á Veðurstofu Íslands hefur verið óvissa í spánni. Í gær leit til dæmis út fyrir að leiðinlegt veður yrði á kjördag með slyddu og snjókomu á norðanverðu landinu.
Nú hefur aðeins ræst úr spánni og verður hiti á bilinu 1 til 9 stig, hlýjast verður á Suðurlandi. Þá má búast við dálítilli rigningu með köflum sunnan- og vestanlands. Léttskýjað verður um landið austanvert.