Árbæjarskóli stóð uppi sem sigurvegari Skrekks hæfileikahátíðar skóla- og frístundasviðs Reykjavíkur sem haldin var í Borgarleikhúsinu nú í kvöld.
Átta skólar kepptu til úrslita að þessu sinni og voru það Austurbæjarskóli, Árbæjarskóli, Breiðholtsskóli, Foldaskóli, Hagaskóli, Langholtsskóli, Réttarholtsskóli og Rimaskóli. Líkt og svo oft áður tóku krakkarnir á stóru málunum í atriðum sínum en geðheilbrigði, mennskan og samfélagið voru á meðal þess sem þau rýndu í með atriðum sínum.
Nemendur Langholtsskóla höfnuðu í öðru sæti keppninnar og nemendur Réttarholtsskóla í því þriðja.
Mikil stemning var meðal áhorfenda, en líkt og svo oft áður þá fór Skrekkur fram fyrir fullu húsi.
Dagur B. Eggertsson borgarstjóri var meðal áhorfenda og sagði hann í Facebook-færslu að keppni lokinni að gleði Árbæinga hefði verið ósvikin. „Hugmyndaauðgi, metnaður og hæfileikar út í gegn.
Frábær atriði frá öllum skólum og ekki annað hægt en að vera þakklátur grunnskólunum og frístundastarfinu sem gefa svona ríkulega af sér og vera bjartsýnn á framtíðina með svona kynslóð að vaxa úr grasi!" sagði í færslu Dags.
Lið frá Hagaskóla báru sigur úr býtum í Skrekk í fyrra og hittiðfyrra með atriðunum RuGi og Elsku stelpur.