Gera má ráð fyrir hæglætisveðri í flestum landshlutum á morgun. Spáð er norðlægri átt, 3-8 metrum á sekúndu, en 8-15 metrum á sekúndu austast á landinu.
Von er á lítils háttar éljum norðaustan til, en bjart verður í öðrum landshlutum.
Frost verður á bilinu 3 til 13 stig. Í tilkynningu frá Vegagerðinni kemur fram að hálka er víða á vegum landsins.
Á Suður- og Vesturlandi eru vegir víða greiðfærir en þó er eitthvað um hálku eða hálkubletti. Á Vestfjörðum er hálka, hálkublettir eða snjóþekja og hálka eða hálkublettir eru á flestum vegum á Norðurlandi. Þá er Dettifossvegur lokaður.
Frétt mbl.is: Dettifossvegur er lokaður
Á Austurlandi er hálka, snjóþekja og hálkublettir og ófært er á Öxi. Þá er einnig hálka eða hálkublettir með suðausturströndinni.