Í dag og á morgun er útlit fyrir norðlæga átt, strekking eða allhvassan vind austanlands en hægari annars staðar á landinu. Veður verður yfirleitt bjart sunnan- og vestanlands en dálítil él norðaustan til. Áfram verður kalt í veðri og tveggja stafa frosttölur að mælast í flestum landshlutum. Ekki er þó um neinn metkulda að ræða, að því er fram kemur í hugleiðingum veðurfræðings hjá Veðurstofu Íslands í morgun.
Hæg breytileg átt um mestallt land á mánudag, víða léttskýjað og áfram kalt.
Veðurspá næstu daga er þessi:
Á þriðjudag:
Suðaustan 8-15 m/s og snjókoma eða slydda, en rigning með ströndinni. Hiti kringum frostmark. Hægari og þurrt á Norður- og Austurlandi fram undir kvöld, síðan dálítil snjókoma á þeim slóðum og dregur úr frosti.
Á miðvikudag og fimmtudag:
Norðaustanátt með snjókomu eða éljum, en yfirleitt úrkomulaust sunnan heiða. Hiti um frostmark við sjóinn, en vægt frost inn til landsins.
Á föstudag:
Hæg austlæg átt og dálítil él, en bjartviðri vestan til á landinu. Frost um allt land.