Ætla mætti að sú vætutíð sem hefur ríkt sunnan- og vestanlands í sumar væri góð fyrir stangveiðimenn sem beita maðki, en ánamaðkar leita jafnan upp á yfirborðið í kjölfar rigninga.
Það hefur hins vegar ekki verið raunin vegna þess að veðrið hefur verið of kalt og maðkarnir ná því ekki að færa sig upp í gegnum kaldan jarðveginn.
„Það er bara ekki neitt,“ segir Jóhann Halldórsson hjá versluninni Veiðiportinu um framboð á maðki til sölu hjá versluninni. „Þetta hefur bara verið hrikalegt í allt sumar og við höfum aðeins fengið maðk til okkar í nokkur skipti,“ segir Jóhann að auki í Morgunblaðinu í dag.