Héldu einum og stuðuðu með byssunni

Árásin sem var gerð á unglingspilta með rafbyssu í gærkvöldi átti sér stað við Hörðuvallaskóla í Kópavogi. Þrír urðu fyrir árásinni en enginn þeirra hlaut alvarlega áverka heldur fyrst og fremst roða.

Frétt af mbl.is

Ráðist á börn með rafbyssu á skólalóð

Að sögn Gunnars Hilmarssonar, aðalvarðstjóra hjá lögreglunni á höfuðborgarsvæðinu, voru piltarnir á skólalóðinni í rólegheitum þegar aðrir piltar komu þangað á bíl og veittust að þeim. Meðal annars héldu þeir einum og stuðuðu hann með rafbyssunni. Ekki er vitað hvað þeim gekk til með árásinni.  

Vasahnífar fundust á piltunum og í bílnum og voru þeir gerðir upptækir. Þeim var ekki beitt í árásinni.

Málið var unnið í samvinnu við starfsmenn barnavendar í nótt og voru foreldrar kallaðir til. Framhaldið verður á þeim vettvangi.

Gunnar segir rafbyssur hættulegar og bætir við að slík mál komi upp í hendurnar á lögreglu öðru hverju. Oftast er þar um ungmenni að ræða og virðast þau eiga auðvelt með að komast yfir byssurnar, meðal annars á netinu.

• 1 blogg um fréttina

Bloggað um fréttina

• Jóhannes Ragnarsson: Þegar Kolbeinn og þeir frömdu ofbeldisverk á piltum í Kópavogi