Viðskipti | mbl | 1.3.2020 | 12:53 | Uppfært 14:16

Óvissa um afkomu Icelandair vegna kórónuveirunnar

Bogi Nils Bogason, forstjóri Icelandair Group. Óvissa er um horfur í rekstri flugfélagsins vegna kórónuveirunnar. mbl.is/Kristinn Magnússon

Afkomuspá Icelandair Group, sem gefin var út 6. febrúar, er ekki lengur í gildi. Stjórnendur félagsins telja ekki mögulegt að gefa út áreiðanlega afkomuspá á þessum tímapunkti, vegna óvissu um hvaða áhrif kórónuveiran mun hafa á starfsemi Icelandair og annarra flugfélaga.

Flugfélagið segir í tilkynningu að ljóst sé að spurn eftir ferðalögum á ákveðin svæði í heiminum sé þegar að dragast saman vegna þeirra aðgerða sem gripið hafi verið til um allan heim vegna útbreiðslu kórónuveirunnar.

Frétt af mbl.is

Icelandair lækkað um 12 milljarða á viku

„Of snemmt er að segja til um möguleg áhrif þessarar þróunar á starfsemi Icelandair Group en þessi staða skapar aukna óvissu þegar kemur að áætlaðri rekstrarniðurstöðu félagsins fyrir árið 2020,“ segir í tilkynningu flugfélagsins.

Sviðsmyndagreiningar standa yfir

Bogi Nils Bogason, forstjóri Icelandair Group, segir að útbreiðsla veirunnar og viðbrögð við henni séu farin að hafa áhrif á ferðahegðun á markaðssvæði Icelandair, sem flýgur frá Íslandi til Evrópu og Norður-Ameríku.

„Vegna þess erum við að greina hugsanlegar sviðsmyndir og móta aðgerðir til að draga úr þeim áhrifum sem þessi þróun kann að hafa á starfsemi félagsins. Öll áhersla verður lögð á að lágmarka áhrif á viðskiptavini okkar en ef mótvægisaðgerðir koma til með að hafa áhrif á flugáætlun, munum við upplýsa um það um leið og slíkar ákvarðanir liggja fyrir. Ég legg áherslu á að öryggi og velferð farþega og starfsfólks okkar er ávallt í fyrirrúmi,“ er haft eftir forstjóranum í tilkynningu.

Ýmsar ráðstafanir

Hann segir Icelandair hafa gripið til ýmissa ráðstafana og aukið viðbragðsgetu innan félagsins til að bregðast við útbreiðslu kórónuveirunnar. „Félagið fylgist grannt með þróun mála, er í reglulegum samskiptum við sóttvarnalækni og landlæknisembættið og fylgir leiðbeiningum og verkferlum embættisins á hverjum tíma,“ segir Bogi.

Icelandair er að auki í nánu samstarfi við Medaire, sem er alþjóðleg læknaþjónusta sem sérhæfir sig í lækningum og forvörnum um borð í flugvélum og veitir ráðgjöf í rauntíma þegar veikindi koma upp og ef grunur vaknar um smit um borð.

„Áhersla er lögð á reglulega upplýsingagjöf til áhafna og farþega sem og aukna vöktun. Einnig hefur félagið farið yfir og eftir tilvikum uppfært verkferla og viðbragðsáætlanir í samvinnu við viðbragðsaðila hér á landi. Þá hefur verið gripið til varúðarráðstafana með viðbótarbúnaði um borð í flugvélum Icelandair, svo sem sótthreinsiefni, andlitsgrímum og hönskum,“ segir Bogi.